Lækkun fasteignagjalda er eitt af forgangsmálum Sjálfstæðismanna á Seltjarnarnesi á komandi kjörtímabili. Við höfum alla tíð fylgt hófsemd í álögum á bæjarbúa og við ætlum að lækka fasteignagjöld í skrefum frá árinu 2027, þannig að lækkunin skili sér með beinum og sýnilegum hætti til fjölskyldna og heimila.
Þá er rétt sem fram hefur komið í umræðunni að vatns- og fráveitugjöld eru stór hluti af heildarreikningi fasteignaeigenda á Seltjarnarnesi. Tillögur þess efnis að lækka þann hluta fasteignagjalda kunna því í fyrstu að hljóma skynsamlega. Slík nálgun er þó ekki markvissasta fyrsta skrefið ef markmiðið er að létta álögur á fjölskyldur og heimili.
Þegar markmiðið er að lækka álögur á heimili bæjarins skiptir máli hvaða liður er lækkaður fyrst. Þá er mikilvægt er að halda því til haga að fasteignagjöld eru sett saman úr ólíkum liðum, svo sem fasteignaskatti, vatns- og fráveitugjöldum, sorpgjöldum og eftir atvikum lóðarleigu.
Fasteignaskatturinn sjálfur leggst á þau heimili og þær fasteignir sem greiða fasteignaskatt samkvæmt lögum. Þegar álagningarhlutfall fasteignaskatts er lækkað skilar sú lækkun sér því beint til þeirra sem greiða skattinn — heimila og fasteignaeigenda.
Vatns- og fráveitugjöld eru annars eðlis. Þau geta lagst á fasteignir sem eru að öðru leyti undanþegnar greiðslu fasteignaskatts. Samkvæmt lögum eru til að mynda safnahús, kirkjur og bænahús undanþegin fasteignaskatti að uppfylltum skilyrðum laganna.
Ef vatns- og fráveitugjöld eru lækkuð ein og sér nær sú lækkun þá einnig til slíkra fasteigna, þar á meðal umfangsmikilla fasteigna, sem kunna að vera undanþegnar fasteignaskatti. Það skýtur því skökku við að lækka þau takmörkuðu gjöld sem bærinn getur þó innheimt af slíkum fasteignum. Verði sá liður er lækkaður, verður tekjutapið meira og svigrúmið til að lækka álögur á heimilin minna.
Þess vegna ætlum við sjálfstæðismenn að byrja á þeim lið sem skilar sér beint til íbúa: á fasteignaskattinum sjálfum.
Markvisst, í skrefum og með hag heimilanna að leiðarljósi
Slíka lækkun munum við gera í skrefum og með ábyrgum hætti. Ákvarðanir sem þessar hafa langtímaáhrif á tekjur sveitarfélaga. Því er afar mikilvægt að reikna í skrefum áætlað hlutfall skynsamlegra lækkana sem taka jafnframt mið að því að rekstur Seltjarnarnesbæjar hefur verið þungur undanfarin ár, líkt og hjá mörgum sveitarfélögum á Íslandi. Viðvarandi verðbólga, hár fjármagnskostnaður, verulegar kjarasamningshækkanir og auknar kröfur um þjónustu hafa sett mikinn þrýsting á rekstur sveitarfélaga um allt land.
Undanfarin ár hefur núverandi meirihluti unnið markvisst að því að tryggja hagkvæmni í rekstri bæjarins við afar erfið rekstrarskilyrði. Sú vinna hefur verið umfangsmikil, en hún er farin að skila árangri. Betra jafnvægi er að nást í rekstrinum og áætlanir gera ráð fyrir stigvaxandi rekstrarafgangi frá og með núverandi rekstrarári.
Þessi staða skapar svigrúm til að hefja lækkun fasteignaskatts — ekki með skyndilausnum, heldur með ábyrgum og markvissum hætti í áföngum, þannig að einstaklingar og fjölskyldur njóti sem mesta ábata af lækkuninni. Um leið ætlum við halda áfram að rýna heildarreikninginn, þar á meðal vatns- og fráveitugjöld, með það að markmiði að gjaldtaka bæjarins sé sanngjörn, gagnsæ og hófleg.
Markmiðið er einfalt: lægri álögur á íbúa Seltjarnarness, í skrefum og með skýrum og ábyrgum hætti.
Elísabet Ingunn Einarsdóttir höfundur skipar 2.sæti á lista Sjálfstæðisflokksins á Seltjarnarnesi
