Á síðasta ári var halli á rekstri Seltjarnarnesbæjar um 100 milljónir króna. Er það mikill viðsnúningur frá árinu 2023 eða yfir 750 milljóna króna bati. Árið 2023 litaðist af miklum gjaldfærslum vegna mygluframkvæmda í grunnskólunum, hærri verðbólgu og hárri gjaldfærslu á lífeyrisskuldbindingu bæjarins vegna launahækkana. Þrátt fyrir það hefur undirliggjandi rekstur verið sterkur, en í fyrra hækkuðu skatttekjur um 9% á meðan launakostnaður hækkaði eingöngu um 4,3%.

Þetta sýnir best hvernig jafnvægi hefur myndast í grunnrekstri bæjarins. Enn er verulegur kostnaðar vegna myglu en yfir einum milljarði króna hefur verið varið í að standsetja grunnskólana af þessum sökum.

Veltufé frá rekstri, þ.e. það fjárflæði sem myndast úr rekstrinum til fjárfestinga og til að greiða niður skuldir nam um 500 milljónum króna í fyrra. Heildartekjur bæjarins nema vel yfir 7 milljörðum. Þrátt fyrir að innheimta ekki hámarksútsvar eru útsvarstekjur bæjarins á hvern íbúa þær þriðju hæstu á landinu (1.052 þús. krónur skv. Árbók sveitarfélaga). Hornafjörður og Kaldrananeshreppur eru hærri!

Háar útsvarstekjur eru öfundsvert hlutskipti fyrir sveitarfélag. Á síðustu misserum hafa einnig komið aukin framlög úr Jöfnunarsjóði sveitarfélaga vegna málaflokks fatlaðra, en Seltjarnarnes hefur um árabil barist fyrir að leiðrétt verði skakt reikningsdæmi eftir færslu málaflokksins frá ríkinu. Er það mikið fagnaðarefni. Enn fremur var góður viðsnúningur í rekstri Hitaveitunnar.

Langtímaskuldir nema um 4,3 milljörðum en efnahagsreikningur bæjarins hljóðar uppá um 11 milljarða króna. Skuldaviðmið bæjarins er 90% en það má hæst vera 150%. Þannig er fjárhagur bæjarins býsna sterkur og hægt er að blása til sóknar með byggingu nýs leikskóla.

Í hvað fara peningarnir okkar?

Um helmingur af heildartekjum bæjarsins fer í launagreiðslur til starfsfólks, svo einfalt er það. Nema launagreiðslur yfir 3,5 milljörðum.

Fræðslu- og uppeldismál eru sem fyrr lang fyrirferðarmest á útgjaldahlið bæjarins, eðlilega, en 56% af skatttekjum er varið til málaflokksins.

Næststærsti málaflokkurinn er félagsþjónustan, en til hennar nema 17,7% af skatttekjum. Í þriðja sæti eru svo æskulýðs- og íþróttamálin með tæp 15%. Aðrir málaflokkar eru mikið mun fyrrferðaminni. Þó skal halda því til haga að rekstur byggðasamlaganna; Strætó, Sorpu og Slökkviliðsins verður æ fyrirferðameiri og sameiginlega verkefni sveitarfélaganna á ýmsum sviðum taka sífellt meiri toll. Með nýjum Samgöngusáttmála er afar brýnt að við Sjálfstæðismenn gætum hagsmuna bæjarbúa í hvívetna og pössum uppá að áætlanir standist.

Tryggir fyrirvarar voru gerðir við sáttmálann af hálfu Sjálfstæðismanna á Seltjarnarnesi um leið og nýtt samkomulag var gert við Reykjavík um samráð um framkvæmdir á samgönguæðum til og frá Nesinu til að tryggja greiðari samgöngur.

Áskoranir framundan – en líka tækifæri

Engum dylst að áfram eru áskoranir í rekstri bæjarfélaga á næstu árum. Mikilvægt er að halda verðbólgu niðri og ráðstafa fjármunum skynsamlega.

Það hafa Sjálfstæðismenn á Seltjarnarnesi ávallt haft að leiðarljósi. Að gera hlutina af yfirvegun, vandvirkni og það sem kannski mestu skiptir – að færast ekki of mikið í fang. Það kann aldrei góðri lukku að stýra.

Viðbótar ungbarnadeild verður sett á laggirnar í kirkjunni og nýr leikskóli fer brátt í útboð. Gera má ráð fyrir að nýir samningar við kennara kosti bæinn á bilinu 150-220 milljónir króna á ári og þeir peningar vaxa ekki trjánum við bæjarskrifstofurnar. Leita verður áfram allra leiða til hagræðingar í rekstri bæjarins og einfalda reksturinn enn frekar. Stefnt er að því að selja lóðina að Austurströnd 7 undir íbúðabyggingu en hún er afar verðmæt. Mun bærinn skipuleggja reitinn og selja hann hæstbjóðanda, en það er allt önnur og betri leið en Reykjavík hefur farið í ráðstöfun á bensínstöðvarreitum sínum. Nýtt skipulag við Eiðistorg býður einnig uppá ýmsa spennandi möguleika fyrir bæinn í náinni framtíð.

En mestu skiptir að grunnrekstur bæjarsins er sterkur og grunnþjónusta við bæjarbúa er ein sú allra besta sem völ er á, hvar sem borið er niður. Af því erum við Sjálfstæðismenn afar stoltir.

Magnús Örn Guðmundsson, formaður bæjarráðs.