Á Seltjarnarnesi hefur persónuleg þjónusta lengi verið einn af styrkleikum bæjarfélagsins. Í litlu samfélagi skiptir máli að íbúar finni að þeir hafi greiðan aðgang að starfsfólki bæjarins, fái svör við erindum sínum og upplifi nálægð við stjórnsýsluna. Slík þjónusta er verðmæt og hana eigum við að varðveita.
Um leið vitum við að stuttar boðleiðir geta bæði verið kostur og galli. Íbúar hafa greiðan aðgang að starfsfólki, bæjarfulltrúum og bæjarstjóra og oft er hægt að koma málum hratt á framfæri með símtali, tölvupósti eða samtali. En þegar erindi berast eftir mörgum ólíkum leiðum verður erfiðara að tryggja yfirsýn, jafnræði, skýra ábyrgð og rétta forgangsröðun. Þá getur skapast sú upplifun að mál fari ekki alltaf í réttan farveg, að svör berist seint eða að íbúar viti ekki hvar erindi þeirra standa.
Þessu ætlum við í Sjálfstæðisflokknum á Seltjarnarnesi að breyta á næsta kjörtímabili.
Seltjarnarnes hefur þegar stigið mikilvæg skref með rafrænum umsóknum, eyðublöðum og Mínum síðum. Nú er tímabært að taka næsta skref og þróa stafræna þjónustu bæjarins áfram með skýrari ferlum, betri yfirsýn og markvissari upplýsingagjöf til íbúa.
Markmiðið er ekki að gera þjónustuna ópersónulegri. Þvert á móti. Markmiðið er að styðja betur við persónulega þjónustu með því að tryggja að erindi fari alltaf í réttan farveg, fái málanúmer, skráðan ábyrgðaraðila og skýran afgreiðsluferil. Íbúar eiga að fá staðfestingu á móttöku erindis, geta fylgst með stöðu mála og vita hvenær þeir mega vænta svara.
Þannig verður þjónustan bæði persónulegri og faglegri. Starfsfólk bæjarins fær betri yfirsýn, stjórnsýslan verður skilvirkari og íbúar upplifa meiri fyrirsjáanleika og traust.
Við ætlum að innleiða heildstæðari stafræna þjónustugátt þar sem íbúar geta sótt um þjónustu, sent inn erindi, fylgst með stöðu mála, nálgast skjöl og fengið tilkynningar á einum stað. Þeir sem vilja eða þurfa að hringja eða mæta á bæjarskrifstofu eiga áfram að geta gert það. En þau erindi sem hægt er að leysa hratt og rafrænt eiga að vera einföld, skýr og aðgengileg.
Við njótum góðs af því að hafa ekki farið of hratt af stað. Önnur sveitarfélög hafa á undanförnum árum prófað lausnir, byggt upp stafræna innviði og mælt árangur. Af þeirri reynslu getum við lært. Við þurfum ekki að finna upp hjólið, heldur getum við nýtt lausnir sem þegar hafa reynst vel, sameiginleg kerfi og samstarf við aðra, meðal annars í gegnum Samband íslenskra sveitarfélaga og Ísland.is.
Árangurinn af stafrænni stjórnsýslu hefur víða verið mældur. Hafnarfjarðarbær hefur til dæmis metið árlegan ávinning af stafrænum lausnum í mannauðs- og launamálum upp á 22,6 milljónir króna. Þá hefur stafvæðing byggingarleyfisferla þar verið metin til 14,7 milljóna króna árlegs ávinnings. Þetta eru ekki aðeins tölur um sparnað, heldur líka vísbending um betri nýtingu tíma, einfaldari ferla og skjótari þjónustu.
Við viljum nýta þessa reynslu á Seltjarnarnesi. Með skýrari stafrænum ferlum má draga úr tvíverknaði, fækka óþarfa fyrirspurnum um stöðu mála, stytta boðleiðir og nýta tíma starfsfólks betur. Það er góð stjórnsýsla: betri þjónusta, skýrari ferlar og betri nýting fjármuna.
Gott upplýsingaflæði skiptir líka miklu máli. Við viljum efla gagnsæi með betri upplýsingum til íbúa um stöðu framkvæmda, afgreiðslutíma erinda, helstu rekstrartölur og framgang stærri verkefna. Með einföldu stafrænu mælaborði geta íbúar fylgst betur með því sem er að gerast í bænum og tekið virkari þátt í upplýstri umræðu um þjónustu og rekstur sveitarfélagsins.
Seltjarnarnes hefur alla burði til að verða fyrirmynd að litlu, snjöllu og nútímalegu sveitarfélagi. Sveitarfélagi þar sem persónuleg þjónusta er áfram í forgrunni, en stafrænar lausnir styðja við einfaldari ferla, betri yfirsýn og betri nýtingu fjármuna.
Þannig má bæta þjónustu, nýta fjármuni betur og efla skilvirka og gagnsæja stjórnsýslu — öllum til hagsbóta.
Elísabet Einarsdóttir
Höfundur skipar annað sæti á lista Sjálfstæðisflokksins á Seltjarnarnesi
